Kundër taksave, jeton në pyll/ Burri prej 10 vjetësh në botën e egër me qenin, ndërtoi shtëpinë dhe mbledh ushqimin në pyll
Një i ri 34 vjec, nga Stambolli, që nuk ka qejf të paguajë fatura në qytet, ka ndërtuar vetë shtëpinë e tij prej druri në botën e egër, ku jeton me qenin e tij për të kursyer mijëra dollarë në vit.
Ky është 34 vjeçari turk, Hakan Karahan, i cili që në moshën 24 vjeç braktisi jetën e zhurmshme të Stambollit për jetesën e thjeshtë dhe mbijetesës në pyll, e cila nuk i kushton thuajse asgjë. Jeton me qenin e tij të racës Akita, Sila
Mund të quhet një eksperiment po i riu thotë se ka kursyer rreth 300 mijë dollarë që kur nisi të jetojë jashtë sistemit një dekadë më parë. Duke shtuar se nuk ka për të paguar fatura qiraje, uji, dritash apo ngrohjeje.
“Në natyrë të gjitha faturat me kushtojnë thuajse 0, kur më pare paguaja rreth 40 000 dollarë në vit. Unë kam lindur në Stamboll, një qytet me më shumë se 20 milionë njerëz, por dhjetë vitet e fundit kam mbijetuar këtu vetëm me ato që më ofron natyra”.
Është vendosur pranë një burimi uji që e përdor për t’u larë dhe krijon vatrat e zjarrit për t’u ngrohur në muajt e dimrit. Ndërsa në vend që të blejë produkte nëpër supermarkete, ai kërkon në pyll dhe mbledh ‘dhuratat’ falas të natyrës për të ushqyer veten dhe qenin e tij.
“Çdo ditë e nis herët në agim. Vendosem zakonisht pranë burimeve të ujit, bëj banjë në ujëvarë, dhe ndërtoj streha dhe vatra zjarri për t’u ngrohur. Nuk kam probleme për ngrohjen”.
Karahan thotë se kryesisht jeton me kërpudha të cilat rriten me bollëk në pyll, dhe qeni i tij Sila ‘nuk i kundërshton ato’.
“Preferoj kërpudhat për ushqim sepse ka shumë në rajonin ku po jetoj. Qenit tim i pëlqen mishi por nuk bën naze dhe ha atë që ha unë.
Karahan pranon se preferon të jetojë i izoluar me qenin e tij pasi “njerëzit e nxitën ta bënte këtë”.
“Ishin njerëzit që më nxitën të jetoj këtë jetë në natyrë. U largova nga njerëz manipulues me dy fytyra dhe tani po strehohem në botën e egër. Jeta me qenin është shumë e bukur. Megjithëse është qen i zbutur ai më ka mbrojtur nga shumë rreziqe pasi kemi lidhje të fortë. Kam mësuar të përballoj sfidat e jetës në të egër. Të gjithë mund ta bëjnë këtë nëse dalin nga ‘zona e tyre e komfortit’, të tejkalojnë veten e tyre dhe rrethanat artificiale të jetës moderne”.
Karahan thotë se më parë punonte 60 orë në javë dhe kishte rrogë të mirë por vendosi të hiqte dorë nga gjithçka për të jetuar me natyrën, shkruan rrjeti.
