Bora mbulon zonat malore në juglindje, Policia: Turistët të pajisen me goma dimërore

Reshjet e borës kanë filluar të zbardhin zonat malore në juglindje të vendit, veçanërisht ato mbi 600 metra mbi nivelin e detit. Fshatrat turistikë si Dardha, Voskopoja dhe Vithkuqi po përballen me kushte të vështira atmosferike, të cilat mund të krijojnë probleme në qarkullim.

Policia Rrugore u bën thirrje drejtuesve të mjeteve që të jenë të pajisur me goma dimërore dhe të tregojnë kujdes të veçantë gjatë lëvizjes në këto akse. Drejtuesit e mjeteve këshillohen gjithashtu të shmangin manovrat e rrezikshme dhe të respektojnë sinjalistikën rrugore për të garantuar një qarkullim të sigurt.

Firmat kontraktore janë angazhuar për të siguruar pastrimin e rrugëve dhe mbajtjen e tyre të hapura, duke garantuar akses të pandërprerë për banorët dhe vizitorët. Për shkak të fluksit të madh të turistëve në Korçë dhe fshatrat përreth gjatë kësaj fundjave, autoritetet janë të angazhuara maksimalisht për të minimizuar çdo rrezik që mund të sjellin kushtet e motit.

Turistët dhe banorët lokalë këshillohen të ndjekin me kujdes udhëzimet e autoriteteve për të shmangur vonesat apo incidentet në rrugë.