Femuri konsiderohet si kocka më e fortë në trupin e njeriut ndërkohë një kinez 35-vjeçar ka arritur ta thyejë atë duke u kollitur. Një rast i pazakontë ka habitur së fundmi mjekët kinezë, sepse frakturat e femurit ndodhin si pasojë e traumave të rënda, si rënie nga lartësia apo aksidente trafiku.
Një burrë i paidentifikuar u ankua te ortopedët se ndjeu një dhimbje të mprehtë në këmbë pasi u kollit shumë, por ai mendoi se ishte një spazmë. Megjithatë, ai nuk mund ta mbante këmbën, ndaj vendosi të vizitojë spitalin.
Një rreze X tregoi një frakturë të femurit, por historia nuk kishte kuptim për mjekët, raporton odditycentral. Ata vendosën të hetojnë rastin dhe të marrin në pyetje pacientin rreth shëndetit në përgjithësi – zakonet, dietën dhe mënyrën e jetesës. Përveç kësaj, është bërë analiza e densitetit kockor, e cila ka dhënë rezultate shqetësuese.
Doli të ishte e ngjashme me densitetin kockor të një burri 80-vjeçar. Analizat rezultuan se ai nuk vuante nga sëmundje të tjera, ndaj u arrit në përfundimin se thyerja ishte pasojë e kockave të brishta, dietës së keqe dhe mungesës së aktivitetit fizik. Burri pranoi para mjekëve se kishte zëvendësuar ujin me pije me sheqer, të gazuara, të cilat mund ta kishin penguar trupin të thithte siç duhet kalciumin.
